民國時期，中國有蔣宋孔陳四大家族，今日就講吓陳家嘅代表人物──陳其美。佢除咗係一名革命黨人，另一個身份就係青幫大佬。陳其美唔單止同孫中山有交情兼做埋蔣介石契哥，仲將蔣介石介紹俾孫中山，令民國政壇從此不一樣。

陳其美1878年生於浙江湖州，喺家中排第二，有一個哥哥陳其業、一個弟弟陳其采。陳其美後來喺當時做緊清軍都統嘅陳其采資助下留學日本，期間認識咗孫中山，仲加入埋同盟會，成為孫中山嘅左右手。1908年，蔣介石亦去咗日本留學，認識咗陳其美，後來喺陳其美介紹之下，蔣介石認識咗孫中山，並加入同盟會。

陳其美。佢嫖賭吃喝樣樣精，不過佢對革命依然非常上心，曾經多次利用作為青幫大佬嘅關係，為革命黨提供人力、物力同財力嘅支持。喺1911年11月3日，佢成功喺上海帶領革命黨人起義，其後出任上海都督。

到咗1913年，孫中山發動二次革命，陳其美出任上海討袁總司令，同袁世凱公開決裂。袁世凱派人俾錢陳其美，叫陳其美唔好反對佢，但陳其美斷言拒絕，袁世凱暗示會派人暗殺佢。陳其美知道自己可能會被殺，於是就將蔣介石推薦俾孫中山委以重任，為咗提升蔣介石地位，陳其美仲同蔣介石結拜做兄弟。

陳其美1916年遭暗殺身亡，後嚟蔣介石為咗鞏固自己地位，就拉攏咗陳其美哥哥陳其業兩個仔陳果夫、陳立夫喺自己身邊，掌管國民黨黨務機關，於是出現咗「蔣家天下陳家黨」呢個講法。

圖片為陳其美，以及孫中山同蔣介石合照，取自網絡。